LAKHUIHTHEI
(PINEAPPLE)

Ananas comosus L.merr

LEI MAMAWHTE

  Lakhuihthei chinna atan hian tui tlin theih lohna hmun, eng leiah pawh, lei thur deuhna hmunah pawh a chin theih vek a ni.

A CHIN PUN DAN

  Lakhuihthei hian chi (seed) hranpa a nei lo va, a chi atan chuan a panga peng (sucker) leh a rah chunga mi (crown) te hi an hmang ber a ni. Heng a panga pengte kan phun hian thla 12 velah par a chhuah thei a. Crown (a chhipa mi) te erawh hi chu thla 19- 20 velah par a chhuah ve chauh thin. Crown te hi an rah a lian bik bawk a ni.

A CHI SAWNGBAWL DAN

  Lakhuihthei chi atana kan lakte hi Ceresan Solution 4 grm-ah tui litre 1 pawlh emaw, 0.2 emaw 2% Dithane M.45 te lakhuihthei chi tura kan ruahmante chu kan chiah hmasa thin tur a ni. Heng hian Bud Rod natna lakah a veng a ni. (Wood Vinegar pawh hi lakhuihthei kan phunna tur leiah leih ila, tlumpi/vual te lakah a veng thei bawk).

A PHUN SAWN HUN

  Lakhuihthei kan phun turte hi tuia chawm ngaihna hmunah chuan April - October thla chhunga phun tur a ni.

A CHI MAMAWH ZAT

  Lakhuihthei kan phun dan azirin hectare 1-ah kung 44,000 a phun theih a ni. Line fel taka phun tur a ni a, Line leh line inhlat zawng chu 2 ft. (60cm) a ngai a, a kung leh kung inhlat zawng chu 1 ft. x 1 ft. (30 cm x 30 cm) a phun tur a ni.

LEITHA PEK DAN

  Lakhuihthei kan phunna hi ram char leh leitha kan phunna hi ram thar leh lei thatna hmunah chuan leitha pek vak ngai lovin a thar thei a. Amaherawhchu, leitha tam lohna hmun leh lei dak tawhna hmunah chuan Organic leitha/bawngek leitha te pek thin tur a ni. Lakhuihthei huan thenkhat hmun awih deuhah chuan a chung sang lamah leitha an pe uar deuh va, ruahtuiin a mawng lamah a sem rual mai thin. A mawng lamah chuan leitha pawh an pe tlem deuh mai a ni.

  Tin, Lakhuihthei rah kan seng zawh hnuah Urea 40 grms hi tui 10 litre ah chawhruala Sprayer (phuhna) hmangin lakhuihthei huan hi thla 2 danah kan kap thin tur a ni. Hei hian Lakhuihthei rah a tithar hlawk em em a ni.

A HMUN THLAWH FAI DAN

  Lakhuihthei huan hi kum 1 chhungin vawi 3 or 4 emaw tal thlawh fai a tha. Hnim thlawh faina te hi vauah paih lovin lakhuihthei bulah dah mai tur a ni. Hnim tawih te hi leithaah a lo chang a, lei a tihnawng bawk a ni. Tin, ruahtui a tlak tlem kumte chuan tui pek theih ni se a tha.

A RAH SENG HUN

  Lakhuihthei rah hi a seng hun atana tha ber chu a rah a lo en tanah lawh mai theih a ni. A rah kan lawh hian tihpem loh a tha, fimkhur taka lawh tur a ni.

A THAR THEIH ZAT

  A hma lama kan sawi tak anga chin a nih chuan hlawk takin a thar theih a, Hectare 1 (2 ½ tin) hmunah hian quintal 50 - 80 thleng a thar theih a ni. (Lakhuihthei rahte nisa lutuk lakah ven nan hian a kung tan daihlim siamsak theih a tha a. A theih chuan Behliang te hi lakhuihthei karah dah a tha bawk. Tin, lakhuihthei rah ni sa lutuk leh sava, chepa, etc. te laka ven nan Buhpawl emaw, hnaha tuam hi a tha bawk. Mizoramah hian a chin theihna awm hmunah te hian uar zawkin ching thei ila a duhawm hle ang ).

Source : Department of Horticulture
Mizoram : Aizawl