LONEITUTE THIAN
Loneitu Hriat Tur Puanchhuahna
Loneitu Hriat Tur Puanchhuahna
Fall Armyworm (Spodoptera frugiperda) hi rannung, thlai tana tihbaiawm pawl tak a ni a. He rannung hian Vaimim bakah thlai dang tam tak sawmriat (80) ngawt a tichhe thin a, a lar deuh te chu :- buh, faisa, fu, buhtun, dal, la, zikhlum, tomato leh a dangte. A lolan tanna chu Tropical leh sub-tropical America ram niin, kum 2016 khan West Africa ram thlengin nasa takin Vaimim leh thlai dangte a tichhia a. India ramah hian June, 2018 khan Karnataka-ah a rawn thleng tih hriat chhuah a ni a, thla kaw (9) chhung lekin state sawm (10) laiah a darh hman a ni. Hriat theih chinah vaimim hmun hectare 1,70,000 laia zau a tichhe tawha hriat a ni a. He rannung India ram leh Mizoramah ngei hmuh a lo ni ve ta hian ram chhunga kan thlai chinte an him ta lo viau a ni tih min hriattir.
Fall armyworm chanchin tlangpui te:
Fall Armyworm (FAW) pangang hian thlai a tichhe ber a. A pui, pangang thlahtu hi Phengphehlep hmul nei,lungphurthlahtu kan tih mai (moth) zan lama chetla chi a ni a, ram hla tak takah pawh pem thei an ni a, zan khat lekah km 100 laia hla a thlawk thei a ni. A pui hi thlaiah a khawm deuhin, 50-200 lai a tui a, a pui damchen ni 10-21chhung hian tui 1000-1500 lai a tui thei. A tui hi ni 2-3 hnuah keuin, a pangang keu thar hi a hring a, a lu a uk emaw a dum a, a lo len deuhah bawngek rawng a lo ni thin, a pang sirah a dung zawngin a dumin a rang a, a mawng lamah spot (val) pali, kil li nei,a intlar a, a lu-ah ‘Y’ letling zawnga inthai a awm bawk.
Vaimim a tihchhiat dan:
1. Pangang keu tir hian a hnah hring a dit a, a hnah chu hmuh tlang theih khawp darthlalang ang hialin a ei pan a (window panes), a eina hnuhma chu a var bawk thin.
2. A pangang puitling hian vaimim hnah a ei pawh bakah a hnah tlang atangin a eihek thin. A eipawh hi a bial emaw a tung sei tak pawh a awm.
3. A zik karah luh chilhin, a zik bula kung lairil te pawh a hreuh chhe thin.
4. A vui insiam tur leh a kawm insiam tir a tichhe nasa bawk.
Fall Armyworm a awm tih hriat hma a pawimawh (early detection):
He rannung chimawm tak hi kan vaimim emaw thlai dang hmunah an awm a nih chuan an awm tih hriat chhuah hma a pawimawh hle, an inthlah pung chak si a, zankhat lekah ram zau taka thlai an eichhe zo vek thei a. Thlai kan venhim theih nan an awm leh awm loh enthlithlai reng a pawimawh. Kan enthlithlaina tura kan hmanraw hman theih te chu-
1. FAW Pheromone traps (NBAIR nanolures) @ 15/acre hi Vaimim tuh atangin emaw a tiah hnuah hman tur.
2. A pui vai khawm nan FAW Pheromone (NBAIR nanolures) traps hi acre khatah 10-15 vel dah a tangkai bawk.
3. Light trap (Eng thang) zana chhit pawh hi a tangkai. Zan dar 7 leh dar 10 inkar velah chhit thin ni se, a hnuaiah an tlak khawmna turin chawhtawlhah tui, khawnvartui nen pawlh hun a tha.
FAW beihnan Integrated Pest Management (IPM) a tangkai:
1. Thlai chin kar lakah emaw thlai chin loh laiin tha taka lei lehphut tur. FAW pupae (buhchium) lai leia awm kha sava leh nisa em leh tihchhiat theihin a pho lang.
Zero- tillage kan tih lei lehphut lova thlai chin a nih chuan Neem cake @ 500 kg/ ha hman tur.
2. Vaimim emaw thlai dang chin hmain pesticides-a chiah emaw phul (seed treatment) tur a ni a. Seed treatment atana hman chite chu- Chlorpyriphos 20 EC @ 5 ml/ kg seed emaw Imidacloprid 30.5 SC @ 6ml/kg seed emaw Cyantranilipole 19.8 % + Thiomethoxam 19.8 % @ 4 ml/kg seed emaw Fipronil 5 % SC @ 5ml/kg seed te an ni.
3. Vaimim leh FAW in a duh loh nia hriat thlai thenkhat entirnan, Legumes (Pigeon pea emaw Black gram) leh vaimim te a inchhawka chin. Thlai hmun vawnfai that leh fertilizer hman tlem a pawimawh tel bawk.
4. FAW tam hun lai pumpelh theih nan thlai chin hun sawn hma emaw sawn tlai. Khaw lum lutuk emaw vawt lutuk ah FAW hi an awmthei lova, ruahtui tlak tam laiin an tlem sawt thin bawk.
5. Thlai chinte ngun leh chik taka enthlithlai a, a tui leh pangang vaikhawm a, tihchhiat a tangkai . Leidip/vut leh chinai (9:1) in pawlh vaimim zik karah phul ila pangang taksa nem a kanga, an thihpui thei.
6. Rannung tangkai, FAW hmelma a awm, Trichogramma pretiosum emaw Telonomus remus @ 50,000/acre kar tinin thlaihmuna chhuah a tangkai bawk.
7. Huanah sava fukna tur thing emaw thildang/dah a tha. Hectare khat hmunah he sava fukna hi sawm (10) vel tal dah ila a tha.
8. A hmaa kan ziah lan IPM Strategy hrang hrang te kan hman tawh hnu pawha thlai kan ven hneh zawh loh chuan Chemical Pesticides kah (Quick Action Strategy) mai a tul tih hriat a tha.
| Crop Stage | Action Threshold | Spray Sequence |
|---|---|---|
| Seeding (Thlai chin atanga a tiah hnu kar 2) | Trap khatah a pui (moth) pakhat man in emaw a kung 5 % (za zelah panga) tihchhiat hi | 1. First Spray (kah hmasak atan): Neem Seed Kernal Emulsion (NSKE) @ 5ml/ 1 litre tui pawlh a kah tur. 2. Second Spray: A tul chuan kar khat hnuah Bacillus thuringiensis variety kurstaki formulation viz. Dipel 8L @ 2ml/litre tui pawlh kah leh tur. 3. FAW hi a tam chhoh zel a thlai za a sawm (10%) a tichhiat-in a hnuaia pesticides engemaw ber hi kah leh tur: (i) Emamectin benzoate 5 SG @ 0.4 g/1 litre tui pawlh ii) Spinosad 45 SC @ 0.3 ml/1 litre tui pawlh (iii) Chlorantraniliprole 18.5 SC @ 0.4 ml/1 litre tui pawlh |
| Early Whorl to Mid-whorl (a tiah hnu kar 2-4 na) | A kung tihchhiat (5-10 %) a tlinin | 1. First Spray: A tul chuan Bacillus thuringiensis variety kurstaki formulation viz. Dipel 8L @ 2ml/litre tui pawlh kah leh tur. 2. FAW hi a tam chhoh zel a thlai za a sawm (10%) a tichhiat-in a hnuaia pesticides engemaw ber hi kah leh tur: i) Emamectin benzoate 5 SG @ 0.4 g/1 litre tui pawlh (ii)Spinosad 45 SC @ 0.3 ml/1 litre tui pawlh (iii)Chlorantraniliprole 18.5 SC @ 0.4 ml/1 litre tui pawlh |
| Mid Whorl –Late Whorl stage (A tiah hnu kar 4-7 na) | A kung tihchhiat (10-20 %) a tlinin | 1. A hnuaia chemical pesticide te hi a in chhawka kah tur: i) Emamectin benzoate 5 SG @ 0.4 g/1 litre tui pawlh ii) Spinosad 45 SC @ 0.3 ml/1 litre tui pawlh iii) Chlorantraniliprole 18.5 SC @ 0.4 ml/1 litre tui pawlh 2. Thiodicarb 75 % WP hi tur chah anga hman bawk tur. A siam dan chu- Buh kem 10 kg+ kurtai kg 2 tui litre 2-3 pawlh (darker 24 up tur)+ thiodicarb 100 g (thiodicarb hi field-a hman hma darkar chanve velah chauh pawlh tur), a zik karah dah tur. |
| Late Whorl (A tiah hnu kar 7 hnulam) | A kung tihchhiat (>20 %) a tlinin. | 1. A hnuaia chemical pesticide te hi a in chhawka kah tur:
iv) Emamectin benzoate 5 SG @ 0.4 g/ 1litre tui pawlh v) Spinosad 45 SC @ 0.3 ml/1 litre tui pawlh vi) Chlorantraniliprole 18.5 SC @ 0.4 ml/1 litre tui pawlh 2. Thiodicarb 75 % WP hi tur chah anga hman bawk tur. A siam dan chu a hmalama ziahlan angin, a zik karah dah tur. |
| Tasseling to harvest (A vuih atanga a seng thleng) | 10% a vui tihchhiatin | Chemical pesticides kah tawh loh a tha, a pangang vai khawma thah a tha. |
Reference:
This website belong to Directorate of Agriculture (Crop Husbandry)
Government of Mizoram
Disclaimer: NIC is not responsible for any inadvertent error that may have crept in the webpage being published on the net.